عندي سؤال
سؤال محيرني
إذا الواحد منا مر بتجربه أذته و ضايقته
شلون يقدر يعيدها هو مع شخص ثاني؟؟؟
ليش السؤال ؟؟؟
كنت مع مجموعه من أهلي وصديقاتي
ثاني يوم العيد في مطعم نتعشى
ودخل المطعم زوج وزوجته
انا أعرف الزوجه وأدري إنها كانت مطلقه وتزوجت مرة ثانيه
اللي معاي يعرفون الزوجه بس ما يدرون إنها
تزوجت مره ثانيه فقعدنا نتناقش في الموضوع
الموضوع يا جماعه إن الأخت اللي قاعدة أتكلم عنها
كمثال للي أبي أوصله لكم كانت متزوجه من شخص
بعد علاقة حب وعشق وغرام
وصار عندهم عيال وعقب فترة طويله من الزواج
دخلت وحده في حياة زوجها وخذته منها وخلته يطلقها
وتطلقت وقعدت تربي عيالها وهذا زين
وحتى لو تزوجت مرة ثانيه مافي مشكله
لكن المشكله إن الأخت خذت واحد متزوج
ودمرت بيت الزوجة الثانيه وحرتها
سؤالي : انتي مريتي بتجربة ان زوجج خذته منج إمرأه ثاني
وجربتي مرارة هالشي وتعبتي واحتريتي
شلون تقدرين تسويين هالشي حق وحده ثانيه ؟؟؟
فهمتوا اللحين سؤالي ؟!!!؟
إن اللي مر بأي تجربه سيئه مو بس في الزواج
في أي شي في حياته وعلاقاته
شلون يقدر يعيدها مع احد ثاني ؟؟؟
إنتو شنو رايكم؟؟
34 comments:
حسب تجربتي في القطاع السئ وهو قطاع المحاكم لقيت اشياء اغرب من اللي تقولينها...واللي شفتيه هذا عادي
غالبا اللي انظلم ,,, مايظلم
بس احيانا القدر والزمن يكونون اقوى منا
يقولج بعض المرات الله يعطي الانسان نعمه النسيان ماتدرين انتي شنو الظروف الي مرت فيها هالمره و ماتدرين يمكن نست الي صار او يمكن عقلها الباطن قالت بتحرق احد مثل ما اهي احترق وايد في اسباب
بس تصدقين انا هم استصعب الشي انه شلون تردين تكررين الشي مره ثانيه
بس ماتدرين يمكن في شي احنا ما ندري عنها
و الله يحفظ الكل و يستر عيهم يارب
thanks 3al el mawtho3 el 7eloo
salamz...
ما ادري بس ناطره الردود مثلج
وايد سالت نفسي
ليش الي انظلم يظلم
ولا تقولين عشان يشوف غيره مثله لاني اعتقد انه هذا مريض نفسي
بمر واشوف الردود بخاطر اعرف راي الكل
تحياتي
البعض يهمه نفسه اكثر من غيره
يعني نفسي نفسي
او تنتقم لنفسها في غيرها ؟؟
ولا تدرين طريقه ارتبطها بزوجها الجديد
الله اعلم
أنا شايف ان الموضوع عادي ..
ماله داعي البيت يندمر .. إذا الزوجة الأولى بتخرب بيتها بعد زواج ريلها عليها هي حرة .. لأنه من حق الريال يتزوج ثانية و ثالثة و رابعة ..
إذا هي مو قادرة تتحمل الزوجة الثانية خل تتطلق ..
و هذي المطلقة فرصتها انها تتزوج .. بعد ياها نصيبها .. تقعد في بيتهم على بو ان الريال متزوج !؟
هذي اختيار الزوج .. هو اللي يبي يتزوج على مرته و هو أدرى بمرته إن كانت بتخرب حياتها و تطلب الطلاق إذا تزوج عليها .. لكن إن كانت عاقلة .. راح تزعل شوي أكيد .. تالي راح ترضى .. و ان رضت من صالحهم هم الأثنين :)
و الزوجة اليدية مالها أي ذنب في الارتباط بزوج متزوج !
طبعا رايي الشخصي و أحترم رايج :)
القصد ليس بقصة الزواج
فقط
ولكن أن أنظلم من أحد أجمل مـن أن أكون ظالم لـ أحد
فـي نعمة النسيان ونعمة صعة الصدر
تجعل القدر هو من يتحكم بمن ظلم وأنظلم :)
Bo7amoood:
----------
الله يستر علينا بستره
Lavender.Q8:
------------
هذا اللي ابي اوصله ان الانسان لما ينظلم المفروض ما يظلم احد بنفس نوع الظلم اللي صار له
برأيى ان المرأه هذى انجرحت من حبيبها وزوجها وتطلقت والجرح عميق وقعدت تربى عيالها بس منظرها جدام الناس انها ضحيه ومسكينه ريلها خذا عليها وتطلقت شى مو سهل فشنو الحل بنظر وايد حريم انها اتزوج وباسرع وقت
كمطلقه وباطقال شنو المتوفر جدامها غير المتزوج او المطلق ونصيبها ياها برجل متزوج ويمكن مثل ما قال اخوى ولد الكويت يمكن اهى ما قصدت تخرب بيت الزوج بس هذا اللى صار
واخر شى ماسوا شى مستغرب هذا شى حلال والله محلله والله يوفقها وتلاقى السكينه اللى مالقتها مع طليقها
5roofa:
-------
كل شي جايز وطبعا ما ادري شنو تفكيرها لما سوت هالشي
اللي ابي اقوله ان اللي انظلم المفروض والصح انه ما يظلم
العفو حبيبتي
مشاركتج فيه هي الاحلى
magnoonah:
----------
هذا نفس سؤالي في كل موقف اشوفه يعني مو بس في هالقصه في كل شي
شلون يقدر اللي انظلم انه يظلم بنفس الظلم؟؟؟؟؟؟؟؟
layal:
-----
صاجه اختي ليال
الانانيه لها دور كبير
ويمكن هي ما تشوف انها ظلمت احد لأن نفسها اهم
Kuw_Son:
---------
احترم رايك الذكوري
اكيد ما فيه شي انه يتزوج
والشرع حلله له بضوابط
والموضوع يا خوي اللي بوصله لكم مو عن تعدد الزوجات
لكن اللي بوصله بالموضوع ان الانسان لما ينظلم شلون يقدر يظلم بنفس نوع الظلم؟؟؟؟
وتسلم ياخوي على المشاركه
khaled:
-------
صحيح كلامك وفهمتني يا خوي وفهمت قصدي
تسلم على هالمشاركه الحلوه
nadeyah:
--------
يعني الانانيه وحب الذات طغت على الصح
يعني علشان الناس ما تطالعني بهالنظره احول الانظار للزوجه الثانيه وآخذ زوجها
هي مرت بهالظلم وجربت مرارته شلون تعيده حق غيرها؟؟؟؟
اكيد حبيبتي هذا اللي سوته حلال وما يخالف الشرع بس يا
عزيزتي سؤالي من البدايه عن شلون اللي انظلم يقدر يظلم وبنفس نوع الظلم وكان المثال قصة هالبنت
قصدي في السؤال كل العلاقات في الحياة وليس علاقة الزواج
اهو النصيب والقدر هذا
بس موحلو جذي ان الانسان يخرب بيت الناس علشان نفسه صج شي مريب اللى قريته اخرب بيت واحد ومرته علشان اخذه من زوجته ليش
هل هو انتقام ولا شنو بالضبط
مادرى ليش في ناس جذي
الله لاييب هالموقف معاي
صج شي قوي وصعب بنفس الوقت
انا اقولك
الناس انواع اكو ما يحبون احد يمر باللى اهما شافوه
و اكو وحدة تتنقم من باب يجربون اللى اهى مرت فيه
اكيد محب يحب انه يخرب بيت اي احد
بس تلاقيه هو اللي جاها وركض وراها
ومحد ضربه على يده عشان يتزوجها
Shaima'a Alkandari:
--------------------
الله لا يورينا هالموقف ولا حبايبنا
وهذا سؤالي شلون استسهلته؟؟؟
على نفسها جنت براقش:
--------------------
اهلا وسهلا فيك في مدونتي وشاكره لج مشاركتج
والله يكافينا شر النوع الثاني ويجعلنا دائما من النوع الاول
محمد بن سالم:
-----------
حتى لو ركض وراها هي ما عندها عقل انها تظلم وحد ثانيه بنفس الظلم اللي مرت فيه
...مملوحه
مرات الانسان اذا شاف الموضوع بتجرد ومن بعيد يقدر يقرر هذا صح وهذا غلط هذا يصير وهذا ما يصير،حسب مشاعره اهو
بس ما يدري بتفاصيل الموضوع ومشاعر اصحابه واشخاصه ولا يدري اذا اهو انحط بهالموقف شنو يصير
اسم الله عليج وعلينا
!!
ليش قاعد اقول جذي؟
لان القاعده ان اللي انظلم ما تهنا له نفسه يظلم،ولكن الاستثناء على هذا انه يظلم اذا اهو نفسه ما درا انه يظلم وحس ان هذا حقه بالدنيا
اذا حكته الظروف وغيرت تفكيره ومشاعره
عسى ربي ما يحرق قلوبنا قولي آمين
:)
الظلم حرام ويرد على راعيه سواء كان مظلوم او مو مظلوم
بس المثال الي انتي يايبته شرعا وقانونا
ما فيه ظلم
بس عرفا يعد ظلم
والعرف ما له مكان عند الله
الملح وقبله
كتبت كومنت شطووله
وعلق الاب توب
:/
الى اذكره وبختصار
احنا ما نعرف ظروف الناس ونواياهم
احنا علينا بالظاهر ومرات الظاهر يخدع
وايد كنت احكم على ناس من الظاهر وحرام اطلع ظالمتهم
الموضوع الى ذكرتيه فعلا يضيق الخلق
ومستنكر على انسانه عاشت مراره هالتجربه اتسويها وبنفس الشى فى بيت ثانى !
الله اعلم
:**
مسااااج الله بالخير
بالبداية الواحد يستنكر اكيييد اشلون اقدرت تعيد صدمتها وتصدم انسانة ثانية
بس صدقيني
طالما ما تكلمتي معاها ما تدرين شنو تفاصيل زواجها الثاني
كل زواج وله ظروفة
بس انا معاج بنقطة
انه اللي يمر بتجربة المفروض يكون حرييييييص الف مليون مرة
لا يكررها مع احد ثاني
بقصد او بدون قصد
بالضبط بالضبط
مثل اللي صار بالكويت ايام الغزو من الفلسطينيين
يعني انتوا عشتوا الظلم والتشريد والاحتلااااااال
اشلووووووون
ترضونه على شعب ثاني والمشكلة هالشعب
اكرمكم
؟؟؟؟؟؟؟
ماني فاهمة
؟!!
esTeKaNa:
---------
هلا والله في استكانه
انا معاج بكل اللي قلتيه والواحد ما يدري شنو ظروف ولا مشاعر الثانيين
لكن القصه كانت فقط مثال لمن جرب تجربه مو حلوة في حياته شلون يكررها في شخص ثاني فقط لاغير
وعساج يالغاليه دوم مستانسه ولا ينحرق قلبج من شر حبيبتي
فريج سعود:
-----------
صحيح ما قلته مثالي كان غلط
بس انا ما ذكرت في البوست انه ظلم انا قلت اللي مر بتجربه اذته وضايقته شلون يخلي غيره يمر فيها
وكنت ابي اوصل لكم بعد ان اللي انظلم المفروض ما يظلم غيره
charisma:
---------
ضحكة القلب
:(
انا معاج في احنا ما نعرف ظروف الناس ونواياهم والله وحده العالم بكل شي
لكن انا مو قصدي في الموضوع احكم على هالانسانه اللي اخترتها مثال ولا نواياها ولا مشاعرها ولا ظروفها كل اللي ابي اوصله انج اذا مريت بتجربه سيئه سواها لج احد او انظلمتي شلون ترضين تعيدين هالشي حق شخص ثاني
فقط لا غير
vancouver:
----------
مسااااااج الله بكل الخير حبيبتي
انا معاج في كل اللي قلتيه يالغاليه
واكيد كل واحد له ظروفه بس انا اللي بوصله انها جربت هالمراره والتعب شلون رضته حق غيرها الا اذا هي مو حاسه ان اللي سوته غلط
ومثل ما قلتي حبيبة قلبي "حريييييص الف مليون مره ما يكررها مع احد ثاني" هذا عزيزتي اللي ابي اوصل له
لا تقلبين المواجع يا فانكوفر انا مثلج مو فاهمه اللي سووه فينا
انا كنت طول الغزو اردد هالكلام انهم مروا بالاحتلال والتشريد شلون يرضون يسوون فينا احنا جذي بس
الله يسامحهم ويسامح كل من طالنا شره
ولا يعيدها من ايام
مشكوره على هالمشاركه الحلوه
يمكن الاخت متبعه نظرية لو دامت لغيرك ما
وصلت لك
دايما اي شي بالدنيا اذا سويناه بدافع الإنتقام ماراح نلقى فيه خير لا لنا ولا لغيرنا
رايي .. اني ما أكون ظالم
اذا انفتح لي جرح من انسان عزيز وهالجرح طبعاً مؤلم
لا يمكن اطبقه على انسان آخر وأنا أعرف قدر الألم اللي مرّيت فيه
راي شخصي .. شكراً : )
ماعندج سالفه هديتى الاكل وشغلت بالج فى ليش هالمره خذت واحد من زوجته ؟؟!!!!
يمكن حبته والحب اعمى وانانى ، يمكن مبداها فى الحياه ظل راجل ولا ظل حيطه، يمكن ماكان سعيد مع زوجته الاولى ، يمكن اهلها ماعندهم حريم تقعد بلا زوج ، يمكن هذا قسمتها ونصيبها .
Post a Comment