قصة قلب........الجزء الرابع
تصل جواهر الى المقهى وهي في قمة التعب والارهاق صار لها ثلاث ليالي ما نامت ..تفكيرها في الأحداث السريعه اللي مرت عليها جعلها في حيره .. هذي اول قصة حب في حياتها كانت تسمع عن الحب في القصص او الأفلام او من قصص صديقاتها اللي مروا بتجربة الحب اما هي فلم تكن تتوقع انها راح تمر فيها بهالسرعه أو بهالطريقه
***********************************
جواهر .. تناديها هدى
تلتفت جواهر لمصدر الصوت وتتفاجأ بوجود أحمد وتبدأ دقات قلبها تتسارع وجسمها يرتجف بشده حتى رجليها لم تساعداها على الوقوف فرمت نفسها على الكرسي قبل ان تسلم عليهم
آسفه بس وايد تعبانه ماني قادره اوقف مشيت مسافه طويله
قالتها جواهر وهي تحاول اخفاء ارتباكها ودهشتها لوجود أحمد
لا سلامات يا جواهر وجهك يبين تعبان سلامات وما تشوفين شر
رد احمد بسرعه وهو قلق عليها بعد ان شاف التعب واضح على ملامحها
الله يسلمك مشكور.. بس شنو هالصدفه الحلوه
ليش لحد الحين ما رجعت الكويت ؟ ما خلصت شغلك ؟
ردت جواهر بعد ما استجمعت قوتها
فرح أحمد باهتمام وسؤال جواهر
انا خلصت شغلي أمس بس حبيت امدد كم يوم
الجو حلو وودي اكون معاك شويه ؟رد أحمد وهو ينظر
لعينيها مباشره يحاول استكشاف ردة فعلها
ايه والله الجو في هالوقت في نيويورك روعه وحسافه الواحد يخليه
ردت هدى بعد ما شافت جواهر مرتبكه من رد أحمد
ها شنو راح تشربون عاد انا عازمكم اليوم
ولا اقول لكم الحين الساعه 12.30 شرايكم آخذكم
مطعم واعزمكم على الغدا علشان ما تقولون اني بخيل
حاول أحمد انه يغير الموضوع لشعوره بالارتباك
ولاحساسه بارتباك جواهر
مشكور أحمد بس مافي داعي للتكليف نشرب قهوه
وما راح نقول عنك بخيل
ردت هدى وهي تضحك
ابتسمت جواهر بعد ان تمكنت من السيطره على نفسها
مشكوور احمد ليش الكلافه انا اعرفك انك
كريم من كثر ما خالد اخوي يسولف عنك بس
اذا بتثبت حق هدى هالشيء كيفك
تضايق احمد من رد جواهر
حست جواهر ان كلامها جرح أحمد فاستدركت غلطتها
شوفي هدى .. أحمد من الذواقه وهو يتردد على نيويورك
وايد ويعرف أحسن مطاعمها فلا تخلينا نخسر هالفرصه
والله حبيبتي انا ما أقدر أتأخر لازم أرجع الجامعه بعد ساعه
ردت هدى على جواهر
خلاص نخليها باكر .. رد أحمد
باكر السبت واجازه وشوفو اذا تحبون تعزمون
معاكم أحد من ربعكم أو أهلكم أنا مستعد شرايكم؟؟
خوش فكره.. شرايك هدى ؟؟ ردت جواهر قبل
لا تعتذر هدى عن القبول
خلاص عطوني رقمكم علشان أأكد الموعد معاكم عقب
ما أحجز المطعم
**********************************
استأذنت هدى من جواهر وأحمد انها لازم تترك
المكان علشان ما تتأخر على محاضرتها والتفتت
لجواهر وقالت لها خليك مع احمد وارجع لك بعد المجاضره
بدل ما تقعدين بروحك .. شرايك؟؟
نظرت جواهر لهدى بتعجب وفهمت خطة هدى الخبيثه
اوكي انا ما عندي مانع بس اخاف أحمد عنده
شغل وأعطله وانتي فرضتيني عليه
هاهاها لا اذا هي فرضتك علي والله خوش فرض
لا انا ما عندي شغل ومثل ما قلت لك مددت علشان اكون معاك
رد أحمد وهو يضحك على الاشارات المتبادله بين الصديقتين
يلا مع السلامه اشوفكم بعد المحاضره
ودعت هدى جواهر وأحمد
سأل أحمد جواهر اذا تحب تشرب شي حتى يكسر الصمت
يا ريت قهوه .. لا لا نسيت انت تقول ان
العصير أحسن ردت جواهر وهي تضحك
اكيد العصير احسن وخاصه ان وجهك يبين انه مرهق
وتحتاجين شيء مفيد لجسمك ومغذي
رد أحمد بهدوءه المعروف وبصوت فيه حنان واهتمام
جعل جواهر تبتسم فرحه وقلبها يضحك معها
شنو هالشعور الجديد ؟ شنو هالاحساس الحلو اللي قاعده تحسه؟
ليش هالطاعه والخضوع له وهي اللي كانت
ما تسمع أحد لما كانوا ينصحونها بتخفيف
شرب القهوه وكانت ترفض نصايحهم؟
هل هذا اللي يسمونه الحب ؟؟
مشاعر كثيره وجديده في داخلها أول مره تحس فيها
سرحت جواهر في افكارها وانتبهت لأحمد يضع عصير
البرتقال أمامها ويسألها وين سرحتي؟
لا قاعده أفكر اني نسيت ما اتصلت في أمي
اليوم وقاعده احسب فرق الوقت
ردت جواهر بربكه حس فيهاأحمد وقال لها
اللحين خوش وقت تكلمينهم فيه وانا ودي اكلمهم
اتصل أحمد في بيت جواهر ورد عليه والد جواهر
هلا عمي شلونكم وشخباركم
بخير يا ولدي انت شلونك
عمي انا تلاقيت مع جواهر صدفه بالقهوه وانا اللحين معاها نشرب قهوه وقلت نكلمكم ونشوف أخباركم وولهانين عليكم
عليكم بالعافيه ولدي وحط بالك عليهاانت مكان النفس
اكيد عمي احطها في عيوني ولا تخاف عليها وبعد اذنك عمي
ودي آخذها وصديقتها باكر اعزمهم على الغداء
يا بختهم اكيد خوش مطعم عليكم بالعافيه
مشكور يا طويل العمر هذي جواهر تكلمك
اعطى أحمد الموبايل لجواهر وهي مندهشه من الموقف ومنحرجه من والدها
هلا يبا شلونك ولهاااانه عليكم
بابا حطي بالك على نفسك وانا مستانس لوجود أحمد وياكم
اي والله ما قصر معاي مسكين كلفنا عليه
يلا حبيبتي نرجع نكلمك بعدين علشات ما نخسر أحمد ثمن المكالمه
انشاء الله مع السلامه.. بابا قول حق امي تكلمني ابي اكلمها ضروري
************************************
انهت جواهر المكالمه وكانت تحس ان أحمد كان طول الوقت يطالعها
اعتذرت جواهر على الاطاله من أحمد وتشكرت منه على المكالمه
شوف أحمد ترى انا قلت لامي كل اللي صار في الطياره
لاني ما أسوي شيء من ورا أهلي
قاطعها أحمد بقوة
جواهر انتو تعرفوني من سنه وانا اعتبر اهلك اهلي واللي ما أرضاه على أهلي ما أرضاه عليك
تأكدي يا جواهر ان انا مو قصدي اللعب
وقصدي شريف ومستعد من باكر اروح
واتقدم لاهلك اذا انتي توافقين
ارتبكت جواهر من رد أحمد
لا لا مافي داعي للاستعجال انا ماني قادره
اتخذ قرار خلنا نتعرف على بعض اكثر
ونتخذ قرارنا صح
انا بالنسبه لي انت اول شخص يبوح لي بحبه
بس ماأعرف عنك اي شيء غير انك صديق اخوي
مدد أحمد زيارته لمدة اسبوع وكان كل يوم
يكلم جواهر ويلتقي معها في اماكن عامه مع
صديقتها الغاليه هدى وكل يوم كان اعجاب
جواهر بأحمد يزيد وكل حوار تكتشف قوة شخصيته
وجمالها واكتشفت ان قلبها بدأ يميل له وان
هناك مشاعر قويه له وخاصه في آخر يوم
قبل رجوعه للكويت
************************************
اكتشف احمد ان قوة شخصية جواهر يزيد من
جمال شخصيتها وجرأتها التي كان يكرها اصبح
معجب بها ولكنه كان يتضايق من عصبيتها اللي
كانت تجعلها لا تفكر قبل الكلام وكان دائما
ينتقدها على ذلك ويقول لها انك لما تعصبين
ما تدرين شنو تقولين ولا تفكرين شنو تأثير
كلامك على اللي جدامك
والعصبيه تأذيك وتؤثر على صحتك وانا مابي أي شيء يأذيك
تلاقوا أحمد وجواهر في نفس المقهى اللي
التقوا فيه أول مره وكان معاهم هدى اللي
فضلت انها تتركهم لوحدهم واستأذنت بالذهاب
للجامعه وتواعدت معاهم انها تلاقيهم بعد
ساعه علشان يروحون يتغدون مع بعض وخاصه
ان أحمد راح يسافر بالليل
التفت أحمد لجواهر: تصدقين الوقت مر بسرعه وما ودي ارجع
نظرت جواهر لاحمد بخجل .. صج متأكد
انك ما مليت مني
والله يا جوهرتي ما أمل منك العمر كله
قالها أحمد بحب وهو ينظر الى عيونها السود الواسعه
ابتسمت جواهر بخجل
يا أغلى الجواهر ما قلتي لي راح تفقديني
وتشتاقيتن لي بعد سفري؟
اكيد ..ردت جواهر وهي تخفي دموعها
**************************************
ودعت جواهر أحمد بعد الغداء وذهبت مع هدى الى شقتها وكانت طول الطريق تبكي وهدى تحاول تواسيها وتهديها
اكتشفت جواهر حبها لاحمد بعد فراقه وانها مشتاقه لوجوده بجانبها كانت تنتظر مكالمانه على أحر من الجمر واتفقوا بعد وصولها للكويت انه يتقدم لخطبتها لأن أحمد كان يريد لحبهم ان يكون في العلن وان تكون علاقتهم مباركه من أهلهم.
في آخر يوم من اجازتها جلست جواهر مع هدى يرتبون ويجهزون شنط السفر
قالت هدى لجواهر وهي تحاول تغيظها
ليش مستعجله مددي الاجازه وقعدي عندي اسبوعين ليش بترجعين بسرعه
تو الناس على الجامعه باقي اسبوعين على الدوام
والله ما عندي مانع بس حرااام أحمد قاعد ينطر رجعتي
ردت جواهر بدلع وغنج وهي تضحك
الحين يهمك شعور أحمد وأنا لأ
الله من لقى احبابه نسى اصحابه .. الظاهر هالمثل سووه علشانك
تستمر هدى في تطفر جوااااهر
ما عاش اللي ينسيني صديقتي وحبيبتي وما تتخيلين شلون أحمد يحبك
ردت جواهر وعانقت هدى وهي تبكي
والله راح افقدك وافقد نصايحك وما راح الاقي احد ابوح له باسراري
رجعت جواهر الكويت وبنفس يوم وصولها فاتح أحمد اهله بحبه لجواهر واستعداده للتقدم لخطبتها
**************************************
12 comments:
أول تعليق، ما أقدر على الانتظار
:)
كالعادة، سرد سلس جميل وتلقائي، أجمل مافيه طبيعيته، كلنا نستطيع أن نجد أجزاء من أنفسنا أو من أشخاص نعرفهم في شخصيات القصة، وفي هذا الجزء ظهرت أول العلامات السلبية لأحد طرفي العلاقة والتي عادة نتغاضى عنها قبل الزواج ثم تكبر وتتفاقم بعد الزواج مثل عصبية جواهر
الله يستر
:)
بانتظارك يا مليحة
أولا اشوه ما طولتي علينا
ثانيا القصة كم جزء بالضبط؟
بس ترى انتي حرقتي علينا القصة احنا ندري انهم بيتزوجون و ينفصلون عقب 3 مادري 5 سنين اكييييييد عصبية جواهر هي السبب ولا أحمد ذهبه وين نحصل واحد مثله هالايام ;pP~
waiting...
waiting too .....
جم جزء؟
بس ترا حلاتج إتحرمصينه بالقصه
بس عسا ما تطلع مثل قصص ألأفريد هيدتشوك و النهايه غير متوقعه و تختلف نهائيا عن إللي نسجناله بداخل خيالنا
مثل ما قالت وايت هارت الطبع ما يتغير أذا جواهر كما وصفها أحمد عصبيه وما تثمن كلامها قبل لا تقوله...ممكن الشخص وهو في بداية العلاقه أو في فترة الخطبه يتحكم قي بعض من أطباعه السيئه بس مو على طول وللأسف تظهر بعد الزواج وهذي أحد الأسباب الرئيسيه في حالات الطلاق في الكويت !! وعندنا مثل دارج في الكويت... بوطبيع ما يغير طبعه
:)
يالله اللي بعدوه
white wings:
------------
الغاليه وايت
افرح كثيرا عند قراءة تعليقك وفي هذه المره فرحتي اكبر بأنك أول تعليق
purplecious:
------------
اولا اشوه انك راضيه عني
ثانيا القصه خمس اجزاء
ولا والله ما حرقت القصه
لا تعطين استنتاجات سريعه
wait for part 5
reema:
-------
حبيبتي ريما القصه خمس اجزاء
والله مو ناويه يالغاليه احرمصكم كافي انكم المود عندكم ضارب بعد انا ازيدكم
والله مافيها مفاجآت
بس انا ما اعرف شنو انتوا ناسجين بمخيلتكم
dilli_o_milli:
-------------
هلا والله في ديللي بدون ميللي ما أدري شفيني عليها وكانني كارهتها
ابه والله بو طبيع ما يغير طبعه بس في اوقات الانسان لما يحب يحاول يخفف من بعض الاطباع لارضاء الحبيب وليس التغيير
اللي بعدو جااااي
kitty:
------
هلا والله في الغاليه قلبي معاك ياكيتي
اشوه ونستج وخليتج تضحكين وعسى هالضحكه دوم يا رب
علميني كتكوته شفيج على جواهر ؟؟؟
مسكينه والله خوش بنيه بس ما في احد فاهمها وهذا سر تعبها
وشفبكم علقتوا علي.. اللي بعدو اللي بعدو
خلوني ارتاح شهر وأرجع لكم
ههههههههه
اشرايج ياكيتي؟
nescafe87:
-----------
لا انشاء الله الجزء الخامس قريبا جدا جدا
ويه انا عبالي خلصت وقعدت ابجي
:)))
خلاص ننطر التكمله
relaaax:
--------
افا ريلااااكس مليتي من القصه؟؟؟
النهايه قريبا جدا
عقب شهر بس
هههههه
kitty:
------
عزيزتي الغاليه
علشان خاطر عيونك ولأنك غاليه عقب اسبووووع اكمل لكم القصه
ها بعد شتبين سويت لك خصم ثلاث اسابيع
شفتي شلون انتي غاليه عندي
هههههههه
اضحك وياك انشاء الله قريبا جدا
واااي يالا لا اطولين علينا
ههههههه
ههههههههههههههه
مودنا ضارب من الشتا و أمراض الحساسيه و اليهال
و إلا ما فينا إلا العافيه
طول عمري أحب لشتا
من يبت يهال و أنا ما أواطنه
الأدويه أزيد من لهدوم!!!!؛
بنسوي إعتكاف علي قصتج
kuwaitia:
---------
والله ما راح اطول عليكم
reema:
------
والله عاد يا ريما يالغاليه انا من الناس اللي أموووووت على الشتا
وكل ذكرياتي الحلوه فيه
بعد عمري الله يعطيج الف عافيه ويخلي لج عيالج ويحفظهم من كل شر
وراح احط بوست عن خلطه طبيعيه للوقايه من الانفلونزا مجربه واذا ما نفعت ما تضر
عقب الجزء الخامس والاخير من قصة قلب انشاء الله
Post a Comment