من هنا و هناك
تحديث
------
ثبتت براءة الصغيرونة وثبت ان هناك تمر
ماركة الشبح ,لا ومو اي شبح شبح عنيزة
اتقدم بالاعتذار للصغيرونة لأني ما صدقتها
لكن انا غير مسئولة عن ما يحدث لكم لما تاكلونه
وفي الاسفل دليل برائتها
تمر الشبح
*********
اتصلت امس في صديقتي في الغربة اسالها
اذا تبي شي اطرشه لها مع اختي اللي راح تزور
المنطقة اللي صديقتي تدرس فيها
وبسرعة ردت علي : اي ابي تمر
قلت لها غالي والطلب تمر
بس حبيبتي اي نوع تحبين
برحي ولا خلاص ولا اي نوع؟؟
ردت الصغيرونة: تمر الشبح
هااااااا ؟؟؟ شنو ؟؟؟
بسم الله الرحمن الرحيم
شنو تمر الشبح؟؟
تمر ينانوه ؟؟؟
من صجج؟؟؟
الله يجعل كلامنا خفيف عليهم
****************************
القيادة في الكويت سبب رئيسي
لامراض القلب والضغط والسكر
ننصحك بالامتناع عنها
*****************************
شنو السبب برايكم اللي يخلي الكل ينسى ؟
الشايب والشاب والمراهق والياهل والكل
ينسى بطريقة مو معقولة
كم واحد منكم يدق تلفون وينسى من داق عليه؟؟
كم واحد يروح يدور شي وينسى شنو قاعد يدور؟؟
كم واحد يدور الموبايل او المفتاح وهو ماسكه
بايده ويصرخ منو ماخذ الموبايل او المفتاح؟؟
اللي يعرف السبب يعلمني اذا سمحتوا وتكرمتوا
****************************
الوضع الصحي في البلد من سيء الى اسوأ
والاخطاء الطبية زايدة
من كم يوم كان راح يكون ضحية هالاهمال
عمي عسى الله يحفظه ويطول في عمره ويقومه بالسلامة
الممرضة المهملة عطته ابرة انسولين وحبوب السكر
بنفس الوقت مع ان الدكتورة كاتبة في ملفه انهم
يوقفون عنه ابر الانسولين ويرجعون
للعلاج السابق اللي هو الحبوب
بس الاخت ما كلفت خاطرها تقرا الملف
وودرته ولو موعناية ولطف الله فيه جان راح فيها
وصل السكر عنده 3 درجات يعني نزل وايد
والحمدلله ان اهله كانوا عنده وقدروا يتلاحقون عليه
ما اقول الا حسبي الله عليهم لا ذمة ولا ضمير
الله لا يحطنا تحت ايدهم ولا يعوزنا لهم
*****************************
44 comments:
احم .. إي ماركة مادري شركته اسمها الشبح ..
جنا :/ عاد أنا اشدراني
يا شينج .. فضحتيني عند خلق الله
LOL
وبعدين سألت أخوي.. بييبلي منه وراح أقولج اسمه الصجي هيهي
----------------------
هاو القيادة بعد لها علاقة بالضغط والسكر نفس حبوب جابر المبارك؟
بس عاد أهو يشجع على التعاطي!
----------------------
السبب في حالتي الكبر وضغط الدراسة :(
ألا ليت الشباب يعودُ سنة بس لين أخلص :/
بس أهم شي كنت قاعدة أحاجي رفيجتي بالموبايل وفجأة أدور على تلفوني ومعصبة أقولها مادري وين حطيت موبايلي :|
----------------------
الوضع الصحي في البلد حاله حال كل شي ، من سيء إلى أسوأ .. الله يعين
سلامة عمج ألف سلامة والله يشفيه ‘إن شاء الله ويقومه بالسلامة
----------------------
وصايرة شاعرة مخضرمة هالأيام؟ ;)
:*****
تمر الشبح !؟
شي يديد ما مر علي !!
القيادة في الكويت تحدي و وناسة .. بس مو الصبح !!
و سبب النسيان أظنج وايد تعبانة و تحتاجين راحة 3 أيام و يبيلج بندول و كمادات باردة أنصاف الليول مع دهان فكس
:P
و هذي وايد تصير معاي .. المفتاح في مخباتي و أنا أدوره !!
أو الموبايل يمي و أقعد أحوس أدوره !!
تصير ترا تصير وايد بس مثل ما قلت لج .. العلاج مكتوب فوق
:P
و الحمد لله على سلامة عمج !! و خطاكم السو
تمر الشبح؟ هههه شيطلع هذا
اما سالفة النسيان و على قولة امي هذي ثواله مو نسيان هههه كلنا كلنا نمر فيها شي ينتقل بالهوا هذا
ذاك اليوم امي بتطلع معاي قالت لي على مادش ابدل و اصلي و جذي
انا كنت جاهزه توني راده من برا .. اثناء تبدلها و صلاتها طرالي اروح الصالون قمت طلعت شغلت سيارتي و سيده الصالون .. توني دااااشه بسم الله
تدق علي امي هااااو وينج !
قمت اطق طوووف نسيتها ! قلتها لا لا يمج كاني بس رحت البنك على ما تخلصين يايتج
و ركضه ارد لها هههههه
بالنسبة للسياقة
اعترف
"احيانا"
اكون احد مسببين الشسمه للسواق في الشارع :|
اما الاخطاء الطبيه فحدث و لا حرج
جراح كبير من اسبوعين مادري ثلاثة
ناسي فوطه في بطن المريض و مات المريض
بس كانت وصيته ان ما يتركون الطبيب بحاله و يتابعون القضيه و استمر المحامي فيها
و الحين هالجراح موقف عن العمل سنه الى المحاكمه
شي يخرع والله و الحافظ الله
و الله يحفظ عمج و يشفيه و يطول لكم بعمره بطاعة الرحمن
نايس بوست :)
تمر الشبح ما مر على الصراحه
ههههههه
النسيان انا اقولج
اصديم الى اهو صدام ما ادرى اشراش علينا بعد الغزوا
كل هالامراض والبلاوى المنتشره بالديره منه حسبى الله عليه حسابن يكفيه
جن نسيان جان عمات عين جان سرطان لا حول ولا قوة الا بالله
جان زهايمر
حتى الحيوانات ما اسلموا من شره
كل البلاوى ترى من اثار هالحرب
وياامه حنشوووف
ما ابى اكدرج
بس فى حروب يايه بالطريج
الله خير حافظ يا مملوحه
الله يكافينا الشر ويشافى كل مريض
بديتها ضحك واقلبت دراما
:(
أي شبح فيهم ؟؟؟
واااااييييي يممممماااا ماني ماكله تمر
صديقتج ام التمر عجيبه
:P
مو بس قيادة الكويت حتى قيادة بنك الوطني يسببونلي نفس الشعور
:(
انا يوم من الايام يمكن انسى نفسي و انتي يا مملوحتي شاهده علي
:|
الله الحافظ
و الله انشاءالله يقوم عمي حمود بالسلامه
\ @@ /
witty:
-------
هههههه
هذا مرسيدس مو تمر
------------
ههههههه
ايه والله نفس الحبوب
راح يخلونا نتعاطاها
ههههه الله يستر
-------------
انت الصغيرونة تقولين كبر احنا عيل شنقووول ؟
-------------
الله يسلمج ويحفظج
اللهم آمييين
-------------
منو عسى مو آنا؟؟
انت تدرين فيني شاعرة وعندي مشاعر
Kuw_Son:
---------
هذا يا وخيي طلب صديقتي الصغيرونة
بس راح نلاقيه يعني نلاقيه
هههههههه
خوش وصفة
وخوش علاج
اشرايك نفتح فيه عيادة
الله يسلمك وخطاك اللاش
Cr8ivia:
---------
ههههههه
هذا الله يحفظنا تمر الينانوة
هههههه
والله ما ادري هذا طلب صديقتي الصغيرونة
بعد عمري مشتهيته وراح ادور لها هالنوع
اشوة مو بس انا اللي انسى
شفتو شلون الكل ينسى؟؟
لا لا لا لا لاتقولين
انج من مسببين الشسمة لنا في الشارع
الله يحفظنا ولا يحطنا تحت رحمتهم
مشكورة حبيبتي
والله يسمع منج
ويحفظ لنا ولكم كل اهلنا
مشكوره على الزيارة والمشاركة وهذا من ذوقج الحلو
charisma:
---------
هههههه
والله حتى انا
صاجة يالغالية كله من هالكيماويات والاسلحة الجديدة
الامراض زايدة وكله تسمعين امراض غريبة
والله يستر من الجاي
عسى الله يحفظنا بلوحه المحفوظ
عساج ما تشوفين الا الكوميدي
وعساج دوم مستانسة
Warda:
-------
هههه
والله ما ادري
اسالها واقول لج
ايه والله هالصغيرونة عجيبة وحبوبة وغالية على القلب
ههههه
انا قصدي القيادة في الشوارع
ههههههه
اي والله انا اشهد
اللهم آمين
weeeeeeeeeeeeeeeeeh
LOL
Mamloo7a Sorry bs 3ashan kent tawni rada min my evening shift in the bank , 3abali il qeyada (management)
anyways
yup seriously driving in Kuwait can cause more than what u mentioned :) Allah kareeem
Warda:
------
هههههه
علامج يا وردة حبي
الله يقطع هالدوام اللي ماكل مخج
الله كريم
احم ... أنا ناطرة التحديث ترى مع رد اعتبار وهدية منج تراضيني فيها لو سمحتي
Witty:
------
احم احم احم .... حطينا التحديث مع الاعتذار وتستاهلين الهدية
ان شاء الله توصل لج الاسبوع الجاي مع تمر الشبح
بس ويتي شلون تاكلين تمر من الينانوة؟؟؟
هههههههه
ملقت؟؟
:))
love u waaayed
:**
ألف سلامة لعمك، الله يحفظه لكم يا رب
تصدقين عاد أنا ما أنسى شي، وساعات أتذكر تفاصيل بايخة مالها داع
تعتقدين مرض؟؟
:)
LOL
لا لا .. ما رضيت بعد.. ما قلتي "كله ظالمتها هالمسكينة حتى يوم قالت لي عن الأيس كريم"
LOLLL
علشان تعرفين بس إني ترى خبرة وأعرف شغلات خطيرة (كلها في الأكل.. الشكوى لله)
وبعدين ماراح يصير في أحد شي إذا كلاه يا شقول .. أصلا بيخليج سوبر وومان ..ما تشوفيني دازه عليه من الكويت؟ والا أكو تمر اهني هاهاهاها
(عاد أنا اللي ملقت حدي مدي)
--------------------
حبيبتي يا غالي :***
تسلمين يا قلبي على العنوى وشكري لي اختج عفية مقدما على التمر والله يديم المحبة يارب :*
بس لا تجذبيني مرة ثانية هااا؟؟
lol
LoFe you khale9 male9 :**
عيل انا سامعة تمر الشبح لول مو غريب
والنسيان يامعودة انا زين ما انسى اسمي
والله حدي متكله ع التذكير بالموبايل كل شي احطه تذكير
والله يكفينا شر مستشفياتنا
والحمدلله ع سلامة عمج : )
اول شى مساء الخير
ثانى شى قرت عيونكم على البراءه
والسواقه بالديره من اول لج عليها
والحين ما شالله عقب ما ترسوا الديره
لياسن الواحد ما يقدر حتى ينتقد
لان الوضع شكله يقول مفيش فايده
اما بالنسبه للنسيان هموم الحياه
:) ونوعية الاكل والقروض
تلعب دور كبير لا تلومينهم
العنايه الطبيه يارج الله
حتى المستشفيات الخاصه
خذت العدوى الاهمال
وعلى قولة واحد من الربع
اشكيلى لابكيلك
:)
تحياتى
بو حمود
تمر الشبح....
موجود موجود
بس من وين يايبينه من معامل الكليجه والا الفتيت؟؟
ياحبي للفتيت
...مسكينه ويتي ظلمتوهااااا
مملوحه...النسيان وماادراك مالنسيان
خليني اقولج سالفة امي مع النسيان ..امي الله يسلمج مااتثبت احد..عادي اتسلم على وحده وتسأل عن امها وامها صار لها سنين ميته
مره بالحج كنا بالسعي شافت امي وحده وقالت لي سالفه بروح اسلم عليها عرفتها ,,,عرفتها...وامي فرحانه لانها بعد قلبي كله تنسى وماتثبت وهذي اعرفتها بوسط هالزحمه..راحت وسلمت وعقب ماارجعت والا اهي غشيانه من الضحك قلت لها اشفيج قالت دريتي منو اللي سلمت عليها ..قلت لاماشفتها..قالت مااطلعت وحده من معارفي...قلت لها عيل..قالت اطلعت الممثله ايمان الطوخي
لاتعليق
:)
مملوحه مايشوف شر عمج
الله يقومه بالسلامه
:*
White Wings:
------------
الله يسلمك ويحفظك
مشكورة عزيزتي
الحمدلله اني انسى وبسرعة
والنسيان في بعض الاحيان نعمة
نحمد الله عليها
Witty;
-------
ايه والله بعد عمري كله ظالمتج
ويالغالية اللي تامرين عليه علشان ترضين راح نسويه
انتي يالصغيرووونة وااااايد غالية
ومافيش ملاقة ابدا ابدا
:)))
حبيبتي واحنا في ذيك الساعة اللي نقدر نسوي لج شي
وخلاص ما راح اجذبج كلش ملش حتى لو صج قاعدة تجذبين علي
lofe u 2
khale9 male9
:****
SHAHAD:
-------
هههههه
الظاهر الجماعة خبراء بالتمر
الا انا اللي مو سامعه فيه
مع اني من اكلة التمر
يعني كل يوم اتريق 5 تمرات مع قهوة تركية سادة
ايه والله يا وخيتي مو معقولة النسيان
والله حتى اليهال ينسون
الله يحفظكم ويتمم عليكم صحتكم وعافيتكم ولا تعتازون المستشفى
الله يسلمج ويخليج
ومشكورة على تشريفنا بزيارتج ومشاركتج
بوحمود:
-------
اول شي الحمدلله على السلامة
ومساء النور
بوجه نبيك يا رب
ايه والله انا لما اطلع من البيت
احس اني داخلة معركة
وارجع البيت منهد حيلي من كثر الضغط النفسي
ايه والله يا خوي ما فيش فايدة
انتقدنا او لم ننتقد
اما بالنسبه للنسيان ياوخيي
حتى اليهال اللي ما عندهم هموم ولا قروض ينسون
انا اعتقد الماء
او الهواء
لانهم العامل المشترك للكل
صح السانك يا بوحمود
اشكيلي لابكي لك
وايد راح ابكي لك
سالفة قلب:
-----------
هههههههه
والله ما ادري من وين
مسكين اخو ويتي جابه لها
بس سؤال مجرد سؤال
الكليجة اعرفه بس الفتافيت ده يبأى ايه بالزبط؟؟؟
وحبتج العافية يا رب
ايه والله بعد عمري الصغيرونة كله ظالمتها
ما ادري عاد اللحين شلون ارضيها
ياحلات امج وخف طينتها
ههههههههه
ايمان الطوخي؟؟؟؟
هههههههههههه
بعد عمري الله يعطيهم الصحة والعافيه هالامهات
اداد لهم والله
انا سامعه جم مرة سوالفها عند اهلي
وشايفتها عندهم الله يخليها ويحفظها لكم
مشكورة يالغالية
والله يسلمج ويخليج يا رب
شااااااايفه امـــــــــــــي
@@
عاد التمر لذيذ؟
_________
ماكو أقراص أو علوج عشان نقطع؟؟
_________
امبييي ... دستي عالجرح
دايما اتصل وما ادري على منو داقة .. آخذ لي جم ثانية على ما استوعب
دايما ادخل الغرفة عشان اييب او ادور شي وانسى .. ارد الصالة اتذكر وبعدين ارد اييبه
دايما ادور تلفوني واهوه بمخباتي
يقولون لا تاكلون جبن وايد يسبب الغباء .. وآنا اكلي كله جبن .. شالعمل؟
+++++++++++++++
الحمدالله .. الله رحمه
ويقوم بالسلامة ان شاء الله
سالفة قلب:
----------
من قال؟؟؟؟
هههههه
اشاعات اشاعات
بس تخيلتها!!!؟؟؟
هههههه اشرايج فيني؟
لي كل الشرف اني اشوفها واعرفها
Alia;
-----
ايه والله ايه والله
--------------
والله يقولون اكو علوج عشان تقطعين
----------------
شفتي شلون
ما ادري شنو السبب
شي مو طبيعي
----------------
الله يسلمج حبيبتي
والحمدلله طلع اليوم من المستشفى
شرايكم باللي يدور النظارة وهي على عيونه
الفتيت الله يسلمج عباره عن بسكوته منتفخه داخلها دبس
مشهورة في عنيزه..
مملوحه انتي لي الحين مصره اتعرفين امي؟؟
;)
مشكورة وايد على كلمة السر
نحو كويت افضل
نحو حوار ديمقراطي ليبرالي راقي حر
ندعوكم للمشاركه في الشبكه الجديده
شبكة الحوار الليبرالي
www.secularkuwait.net
بعد التحية
أؤيدج أن القيادة بالكويت تييب الغم ..
الله يعين و يخفف الحوادث
النسيان سمة لصيقة بكل إنسان
آنا أقول السبب في إن النسيان يوصل لهالدرجة .. أهو انشغال البال في تلك اللحظ ويكون في القمة زائد الله أعلم .. يمكن الذاكرة بهاللحظة تكون ممسوحة وبعدين ترجع .. أو يرجع الملف لمكانه ويستدركه العقل
هالشي يهون عن صديقتي كانت تدور موبايلها وإهي بالجمعية والمشكلة إن الموبايل إلي تدور عليه بإيدها وقاعد تكلمني منه
شرايج بهالموقف؟؟
قمة قمة النسيان
النسيان نعمة بس عاد مو اذا نسيتينا
وينج يا حافظ؟
:)
Q8links:
--------
ههههه
تحصل في احسن العائلات
سالفة قلب:
----------
هلا والله في الغالية
خوش شرح
ومنكم نستفيد
ههههههه
والله لي الشرف اني اعرفها
do i know your mother?
ههههههههه
العفو حبيبتي
الا الدستور:
------------
شكرا للدعوة
بركان:
-------
اهلا وسهلا
الله يعين
والله يحفظنا من حوادث الطريق
Almas:
-------
ايه والله لاصقة في الكبير والصغير
تفسير معقول ومفيد
ههههههه
رأيي ان الموقف يحصل في احسن العائلات
White Wings:
------------
موجودة يا حافظ
وما عاش اللي ينساكم يالحبيبة
والله يا مملوحه الخطأ وارد بكلا القطاعين ولكن ازدياده يسبب ربكه بالوضع الصحي وللأسف ...يالله معصومه لمبارك فيها الخير ان شا الله ....
من ناحية النسيان لازم يسوون ابحاث على الماي اللي نشربه :)
والله يبعد عنكم وعنا كل مكروووه قولي امين
اه يابلد
على طاري الوضع الصحي
قبل اسبوع وصل الى الجمهورية الفرنسية وفدا طبيا من وزارة الصحة في الكويت لتفقد احوال المرضى في فرنسا
وقد استبعدوا 60 حالة معظمهم من الناس الذين بهم الشّين اي السرطان الله يحفظ الجميع
شاهدت انسان كويتي هو وزوجته من المستبعدين قال لي انا صار لي شهرين بس يفحصوني عشان العملية وباقي على عمليتي اسبوع والحبايب وصلوا من غير ان يقابلون او حتى يراجعون المستشفيات الموجوده والتي تتابع حالات المرضى فقط اعطوا اوامرهم لكي يرجع هذا الشخص ويقول المسكين طيب انا مكلف الدولة فحوصات وتحاليل لمده شهرين كل هذا يروح عشان العملية اللي بتصير قبل اسبوع
والسبب ان الوفد الطبي ماشاء الله عليه بفطنته وخبرته اكتشف ان علاجه متوفر بالكويت
انا قايل مسافر عشان ارتاح بس بصراحه كلامج عور قلبي وقلت لازم ارد
وعاشت معصومه
وزيرتنا المبجله
3ateeja:
--------
اهلا هلا
في عتيجة
نتأمل ذلك ان شاء الله
لازم يسوون ابحاث على الماء والهواء
لان النسيان مو طبيعي عندنا ولجميع الاعمار
مشكورة عزيزتي
واللهم آمين
barrak:
--------
حيا الله اخوي براك
ما نقول الا حسبي الله ونعم الوكيل
الله يبعد عنا وعنكم شر المرض وعسى الله لا يعوزنا الا لوجهه الكريم
والله لا يحطنا تحت رحمتهم
جدا آسفة عورت قلبك ويا وخيي استانس باجازتك وارتاح وخل الهموم تولي
أنا اقول عديها ، اي تشوفينه غلط بالديره بالمستشفى او بالشارع او بأي مكان .. استغفلي وطولي بالج ، طول ما الديرة تمشيها هنادوة و مصريين و أجانب اكيييد ماكو شي بيمشي صح .. إذا اهل الديره نفسها بايعينها تبين هالمرة الاجنبي ..
طوللللللييييييي باااااااالج
;p
Post a Comment