أوامر المملوح الأمريكي جوزيف

مساء الخيرات على أحباب قلبي الغالييين

شخباركم ؟ وشعلومكم ؟

أدري وايد طولت عليكم

وأدري من زمان ما تواصلت معاكم

بس شسوي هذي اوامر

المملوح الأمريكي

د. جوزيف

؟؟؟؟؟؟؟؟؟؟؟؟؟؟؟

أدري بتسألون وودكم تعرفون

منو هالمملوح اللي يتأمر علي؟؟

يا محفوظين السلامه السالفه طويله

+*+*+*+*+*+*+*

من بداية السنه الهجريه الجديده

نويت صيام كل النوافل

وفعلا بديت بفضل الله صيام الأيام البيض من شهر محرم

وواصلت صيام سبعة أيام كنت ناذره صيامها بعد

وكنت احس بتعب وخمول وتغير في المزاج

بس كنت أعتقد انها من الصيام

وكملت صيامي لمدة عشرة ايام

+*+*+*+*+*+*+*

وفي بداية فبراير حسيت ان الامور قاعده تزيد

واني لما اتضايق ولا اتنرفز احس برجفه مو طبيعيه

في جسمي لدرجة اني ما اقدر استخدم ايدي

ولا اقدر اوقف .. احس ريولي ما تشيلني

+*+*+*+*+*+*+*

وبما ان لي سابقه مو حلوه في جلطة الراس

ولأن دكتوري استشاري في مستشفى الموت

قصدي مستشفى مبارك

فقلت ابعد عن الشر واغني له

وكلمته في عيادته الخاصه

وكان الجواب الموعد بعد شهر

لان الدكتور مشغول وعنده سفرات

يا سلاااام كلش مو خووووش كلاااام

على ما يحين موعدي الا ما أدري شنو بيصير فيني

والاشياء الغريبه قاعده تزيد في جسمي

وبدا موديل دقات القلب السريعه و المو طبيعيه

ما اقدر اركز في شي ويسبب لي هالشي نرفزه

لا وشوي بديت اغيب عن الوعي فجأه

وبدت حالتي النفسيه تسوء

وما اقدر اسيطر على مشاعري ودموعي

يارب شنو هاللي قاعد يصير فيني؟؟؟

+*+*+*+*+*+*+*

وبعد التفكير والمحاتاة

تييني فكرة المستشفى الامريكي في دبي

ليش ما اروح واخليهم يشوفون شفيني

وخاصه اني كنت سامعه انه يتعامل مع

مستشفى مايو كلينيك في امريكا

وقمت واتصلت فيهم واخذت المواعيد

وسبحان الله شلون ربي بفضله يدفع عني البلاء

انعزم مع صديقات غالين على قلبي على ريوق

قبل سفرتي بثلاث ايام

واتناقش وياهم عن المستشفى الامريكي في دبي

وينصحوني باني ما اروح وان لهم تجارب سيئه وياهم

وانهم ما يتعاملون مع مايو كلينيك ولا شي

ياربي شهالوهقه شسوي بروحي؟؟؟

+*+*+*+*+*+*+*+*

واقوم واتصل في المستشفى ويصخر لي ربي سبحانه

هالسكرتيره الحبوبه وتعطينا رقم مايو كلينك في دبي

واتصل فيهم وتتسهل مواعيدي وياهم واستخير الله

ويسهل الله دربي ترافقني اختي الغاليه ونسافر لدبي

+*+*+*+*+*+*+*

واروح الموعد

وتشوفني مساعدة الدكتور

وتقعد تقريبا نص ساعه تسأل وانا اجاوبها

وتقيس الضغط وتسجل كل شي عني قبل لا يشوفني الدكتور

ويشوفني الدكتور المملوح جوزيف

ويقعد معاي ساعتين يفحص ويسأل عن كل شي

ويسجل في الكمبيوتر الخاص كل التفاصيل

اللي سألني عنها ويحفظها في ال

data base

لمستشفى مايو كلينيك في مينيسوتا

"بالضبط نفس اللي عندنا"

ويبدأ بعد الفحوصات بإعطاء الاوامر

الابتعاد عن التوتر والتنرفز*

الإبتعادعن التركيز في اي شي*

مثل القراءه واستخدام الكمبيوتر

تعليمات حياتيه جديده اتبعها بحذافيرها*

واستمر في العلاج اللي آخذه*

لحين عمل فحوصات جديده للتأكد مما اعانيه

ونتايجها تطلع هاليومين ان شاء الله

+*+*+*+*+*+*+*

وأنا للحين انطر نتائج الفحوصات

وخاصه ان الدكتور مسافر الى امريكا وهناك بيسوي كونسلتو

يشوفون حالتي وعقب يعطوني النتائج والعلاج اللازم

والله يسهل الامور

ومن غلاكم يا خواتي واخواني

ولأني ما ابيكم تحاتوني

خالفت الأوامر

وفتحت اللاب توب

وكتبت البوست

علشان اطمنكم علي

الله لا يحرمني منكم ومن محبتكم

ولا يطول غيابي عنكم

ولا تنسوني من دعائكم

وسامحوني على القصور يالغالييين