كلمة شكر لأمي
قصيدتي زاد بعيوني جمالها .. واخذت أنقي بالمعاني جزالها
واكتب معانيها من الشوق والغلا .. لأمي وأنا أصغر شاعر من عيالها
كتبتها في غربتي يوم رحلتي .. لما طرالي بالسفر ما طرالها
امي وانا بوصف لها زود حبها .. وان ما حكيت لها قصيدي حكالها
امي لها بالقلب والجوف منزله .. مكانه ما كل محبوب نالها
اقرب من ظلالي وانا وسط غربتي ..وانا تراي أقرب لها من ظلالها
ماشافت اعيوني من الناس غيرها ..ولا خلق رب الخلايق مثالها
اغلا بشر في جملة الناس كلهم ..واكرم من ايدين المزون وهمالها
اتبع رضاها ورتجي زود قربها .. واللي طلبته من حياتي وصالها
الصدق مرساها والاشواق بحرها .. والعطف واحساس الغلا راس مالها
اهيم فيها وابتسم يوم قلبها .. يسأل وانا قلبي يجاوب سؤالها
وان اطلبتني شي فزيت مندفع .. اموت أنا واحمل تعبها بدالها
واصبر على الدنيا والاحزان والتعب .. واحمل على متني فطاحل جبالها
واسهر اعذب راحة القلب بالشقا .. واعيش اعاني بس يرتاح بالها
تربية ابوي اللي على الطيب بذكرة .. اللي وهبني الحياه ومجالها
الوالدين اولى بالاحسان لجلهم .. وأولى بتكريم النفوس وعدلها
اقولها وانا على الله متكل .. والله عليم بقدرتي واحتمالها
ياكلمة اغلى من الناس كلهم .. يا شمس بقلبي بعيد زوالها
يافرحة تملي لي الكون باكمله .. ياشجرة تكبر ويكبر ظلالها
تضحك لي الدنيا ليا شفت زولها .. مثل السما تزها بطلة هلالها
والبعد عنها ياهل العرف ماقدره .. لا شك ناري زايده بشتعالها
ماعيش ببلاد ولاهيب بأرضاها .. ولا بي عيوني كان ماهي قبالها
أرض ٍ تدوس امي بالاقدام رملها .. اموت فيها واندفن في رمالها
الشاعر : حامد زيد
أهديج هالقصيده يا نور عيني
ومهما قلت في حقج شويه
يا بعد عمري يا أمي الغاليه
وقفتي معاي في مرضي
وقويتيني بإيمانج القوي و اللامحدود
وعلمتيني أحط أملي بالله
ولا أيأس من رحمته سبحانه وتعالى
عطيتيني إهتمامج وحبج وعطفج
وساعدتيني في تقبلي للمرض
وخففتي علي الكثير والكثير
حسستيني بالأمان والراحه بعد التعب
على حضنج أحط راسي وأبجي
وإنت تقرين القرآن علي
وتمسحين على راسي
بإيدينج وتبجين معاي
وتخشين ويهج عني
علشان ما أشوف دموعج
نظراتج لي كل يوم .... تشوفيني
وتتطمنين علي ..زينه ولا موزينه
لهفتج وخوفج علي .. كل ما شفتيني تعبانه
.................................
آاااااه يا أمي .. يا بعد عمري وحياتي ودنيتي
سامحيني أذيتج يالغاليه وأنا المفروض أريحج
سامحيني أذيتج في محاتاتج وخوفج علي
الله يقدرني على برّج يا يمه
وعسى الله يقدرني وأرد جمايلج الكبيره
الله لا يحرمني منج ومن حبج وحنانج
ويخليج لي لأني بدونج ما أسوى شي
يا أطيب وأحلى وأرق أم
هذي كلمة شكر واجب علي إني أكتبها لج
وأطلب من الله يطمن قلبج ويريحج
يا غلا وحب الدنيا كلها
يا أمي
